பொறியியல் தவிர்த்து என்ன படிக்கலாம்?

கடந்த சில வருடங்களாகவே பொறியியல் மீதான மதிப்பும் மோகமும் வெகுவாக குறைந்துவிட்டதென்பது நாம் கண் முன் காணும் நிதர்சனம் (முந்தைய பதிவு -> பொறியியல் மீதான மதிப்பும் மோகமும் குறைந்தது ஏன்? ).  பொறியியல் தவிர்த்து வேறு என்ன படிக்கலாம் என்பது இப்போது பிள்ளையை பெற்ற எல்லோருக்கும் இருக்கும் பெருங்குழப்பம், குறிப்பாக கடந்த/நடக்கும் கல்வியாண்டில் மேல்நிலை கல்வி படித்த/படிக்கும் பிள்ளையை பெற்றோருக்குத்தான் தலைவலி அதிகம்.  அவர்களுக்கு இருக்கும் மனக்குழப்பம் போதாதென்று அக்கம் பக்கத்தினர், சுற்றம், நண்பர்கள் என்று ஆளாளுக்கு அவர்களால் முடிந்த அளவு அழுத்தத்தை கூட்டிக்கொண்டே இருப்பார்கள்.  இப்பொழுதுதான் 'என்னா மார்க்கு பொண்ணு எடுத்திருக்கு?' என்கிற கேள்விக்கு 1042-வது முறையாக பதில் சொல்லி மதிப்பெண் குறைவாயிருந்தால் அதற்கு 1043 காரணங்கள் சொல்லி, 1100-க்கு மேலிருந்தால் நாங்கள் 1190 எதிர்பார்த்தோம் என்று ஒரு பில்டப் எல்லாம் கொடுத்து ஓய்திருப்பார்கள்.  வேதாளம் முருங்கைமரம் ஏறிய கதையாக அடுத்து ஆரம்பித்திருப்பார்கள்,

'என்னப்பா மகனை மேல என்ன படிக்கவைக்கப் போற?'

'அந்த காலேஜ்லயா? அது சரியில்லயாமே... என் சகலப்பாடி பையன் கூட அங்கதான் படிச்சான், இந்தா இப்ப வெட்டி ஆபிசரா சுத்திவந்துட்டுருக்கான்...'

'என்னப்பா எந்த காலத்துல இருக்குற நீ? ம்... கம்ப்யூட்டர்க்கு சேக்கறேங்கற... அங்க ட்ரம்ப் எல்லாரையும் தொறத்திட்ருக்கான்னா, இங்க ப்ரேம்ஜியும் தொறத்திட்டுருக்காறாம்..
என்னாது... யப்பா அந்த ப்ரேம்ஜி இல்ல அசிம் ப்ரேம்ஜிப்பா விப்ரோ கம்பெனி இருக்கு இல்ல அதுக்கு ஓனரு.  ஏதோ ரெசசனாம் ஐடி-ல எல்லாரையும் வேலைய உட்டு எடுக்குறாங்களாம்.  இப்ப போய் கம்ப்யூட்டர் இன்ஞ்சினியரிங் சேக்கற... என்னமோ பாத்து பண்ணுப்பா'

'என்னாது அவ்ளோ தூரத்துல இருக்கற காலேஜ்லயா?  ஏன் இங்கலாம் சீட் கெடைக்கலயா... ஒத்தப் பொண்ண பெத்து வச்சுகிட்டு தூரத்துல ஆஸ்டல்ல சேக்கறேங்கற.  பாத்துக்கப்பா காலம் ரொம்ப கெட்டுக்கெடக்கு...'

'இப்பலாம் இஞ்சினியரிங்கு எங்கப்பா மதிப்பிருக்கு சொல்லு..'

'BA தமிழா? நல்ல ஆளுப்பா நீ'

சரி என்னதான் படிக்கலாம் பொறியியல் தவிர்த்து (பொறியியல் படிக்காதீர்கள் என்று சொல்வதல்ல இப்பதிவின் நோக்கம்).

மிக மேலோட்டமா சொல்வதானால் இப்படி சொல்லலாம்

1. அடிப்படை அறிவியல் ( இயற்பியல், வேதியியல், கணிதம், விலங்கியல் போன்று)
2. அடிப்படை அறிவியல் சார்ந்த சிறப்புப் பிரிவுகள் ( உயிர்வேதியியல், உயிரிதொழில்நுட்பவியில் போன்று)
3. கலைப் பிரிவுகள் (தமிழிலக்கியம், ஆங்கிலம், வரலாறு போன்று)
4. கணினி மற்றும் அது சார்ந்த பிரிவுகள் (கணிப்பொறியில், கணினி பயன்பாட்டியில் போன்று)
5. வேளாண் அறிவியல்
6. துணை மருத்துவப் படிப்புகள் (செவிலியர், மருந்தாளுணர், மருத்துவ ஆய்வுக்கூடப் படிப்புகள்)
7. மாற்று மருத்துவப்படிப்புகள் (சித்தா, ஆயுர்வேதா, யுனானி - தற்போதுள்ள நடுவண் அரசு இப்பாரம்பரிய மருத்துவ முறை குறித்த விழிப்புணர்வையும் பல சலுகைகளையும் கொடுத்துவருகிறது)
8. வணிகவியல், நிர்வாகவியல்
9. உளவியல்
10. திரைப்படம் மற்றும் கிராபிக்கஸ், அனிமேஷன் சம்பந்தப்பட்ட படிப்புகள்
11. நுண்கலை பாடப்பிரிவுகள்
12. தொலைக்காட்சி மற்றும் ஊடகம் தொடர்பான பாடங்கள்
தொல்லியல், கல்வெட்டியல், சைபர் செக்யூரிட்டி, நூலக அறிவியல் ....

இப்படிப்புகளை எங்கு படிக்கலாம் -> ஆண்டு வாரியாக இந்தியா டுடே நீல்சன் சர்வே.


முடிந்தால் இதன் கூடவே தட்ட்ச்சு, கணினியில் அடிப்படை டிப்ளமோ, பிரெஞ்ச் போன்ற அயல் நாட்டு மொழி பயிலல் என பன்முக திறமையை வளர்த்துக்கொண்டால் பணிவாய்ப்பின் போது முன்னுரிமை கிடைக்கும்.

இன்னும் எவ்வளவோ இருக்கிறது.  மேற்சொல்லப்பட்ட பாடப்பிரிவுகள் எதுவும் எந்த தரவரிசை அடிப்படையிலும் சொல்லப்படவில்லை.

நினைவில் கொள்ளுங்கள்
1. எல்லா காலத்திலும் எல்லா துறையிலுமே திறமைசாலிகளுக்கு எப்போதும் தேவை இருந்துகொண்டுதான் இருக்கும்
2. அவர்களுக்கு அடுத்தப்படியாக திறமையை வளர்த்துக்கொள்ள தயாராய் இருப்பவர்களுக்கும் வேலை இருந்துகொண்டு தான் இருக்கும்
3. எது ஒன்றையும் புதுவிதமாய் அணுகுபவர்களுக்கும் , புதியதாக ஒன்றை முயற்ச்சி செய்வோருக்கும் வரவேற்பு குறையாமல் இருந்துகொண்டேதான் இருக்கும்
4. படித்தது வேறு, பார்த்த வேலை வேறு என்று இருப்பவர்கள் பலரும் மிகப்பெரும் சாதனையாளர்களாக இருக்கிறார்கள் என்பதும் கண்கூடு.  (நண்பன் திரைப்படம் நினைவிருக்கிறதா?)

மனதிற்க்குப் பிடித்த ஒன்றையே உங்கள் வேலையாக மாற்றிக்கொண்டால் உங்கள் வாழ்நாளில் நீங்கள் வேலையாக ஒன்றைப் பார்க்க வேண்டாம் என்பார்கள்.  அப்படி ஒன்றை உருவாக்கிக்கொள்ளுகள்.


குறிப்பு;
நீங்கள் அறிந்த பிற பாடப்பிரிவுகளை பின்னூட்டமிட்டால் மற்றோருக்கும் பயன்படும்.

ராஜா ராணி - திரைப்படம் ஒரு அரைகுறை விமர்சனம்.

ஒரே வாக்கியத்தில் சொல்ல வேண்டுமானால், "படம் அழகான கவிதை போல இருக்கிறது."
There is LIFE after love failure
There is LOVE after love failure
இதுதான் படத்தின் tagline.  அதை அப்படியே பிரிதிபலிக்கும்படி படமும் வந்துள்ளது.

நம் எல்லோருக்கும் தெரிந்த, பார்த்துப் பழகிய, அரதப் பழசான அதே காதல் கதைதான் (கொஞ்சமே காலே அரைக்கால் வித்யாசமான) என்றாலும்,, வழங்கிய விதத்திலும் (திரைக்கதை) கதாப்பாத்திரத் தேர்வினாலும் படம் சிகரமாய் எழுந்து நிற்கிறது.

 படத்தை தோளில் தாங்குவதில் ஆர்யா, நயன்தாரா, ஜெய், சத்யராஜ் போன்றோரின் நடிப்பும், படத்தையொட்டி, கதையையொட்டியே அமைந்த சத்யன், சந்தானத்தின் காமெடியும் முக்கியப் பங்காற்றுகிறது.  கவிதை போன்ற படத்தில் G. V. பிரகாஷின் இசை மயிலிறகு போல மென்மையாய் வருடுகிறது (பின்னணி இசை டாப்).  பாடல்கள் எனக்கு பெரிதாய் மனதில் பதியவில்லை, 2,3 முறை கேட்டால் பிடித்துப்போய்விடும் ரகம்.

  ஏ.ஆர் முருகதாஸுக்கு கதையே இப்படி அமைகிறதா இல்லை அமைத்துக் கொள்கிறாரா எனத் தெரியவில்லை.  "எங்கேயும் எப்போதும்" போல இங்கேயும் 2 காதல், சில ப்ளாஷ்பேக், காதல் ஜோடியில் ஒருவர் விபத்தில் இறக்கிறார்.  முதல் பாதி ஒரு காதலுக்கும், மறுபாதி பிறிதொரு காதலுக்கும் என பிரித்துக்கொண்டு  அறிமுக இயக்குனர் அட்லி (எங்கேயும் எப்போதும் இயக்குனர் சரவணனைப் போலவே) இயக்கியுள்ளார். 

கதை:
முதல் காதல் முழுமையடையாத ஜான்(ஆர்யா), ரெஜினா(நயன்தாரா), இருவரும் பெற்றோரின் விருப்பத்திற்காக திருமணம் செய்துகொள்ளும் இருவரின் விருப்பமும் இல்லாத திருமணத்தில், ஒருவரை பற்றி ஒருவர் புரிந்து கொள்ளாத, கொள்ள விரும்பாத, தினம் வாழ்க்கை ஒடுகிறது.  திடீர் உடல்நலக்குறைவால் பாதிக்கப்படும் ரெஜினா தனது முதல் காதல் ப்ளாஷ்பேக்கை ஜானுடன் பகிர்ந்துகொள்கிறார்.

கஸ்டமர்கேர் காலில் மோதலில் ஆரம்பித்து, காதலில் முடிகிறது ரெஜினா, சூர்யா(ஜெய்) ப்ளாஷ்பேக்.  கலகலவென ஓடும் படத்தின் கலகலப்புக்கு சத்யன், ஜெய் ஜோடி க்யாரண்டி.   சத்யராஜ் நடிப்பில் அட்டகாசம் என்றாலும் அவரும், நயன்தாராவும் வரும் பல காட்சிகள் எனக்கு ஏற்புடையதாய் இல்லை(ஒரு வேளை மேல்தட்டு மக்களின் வாழ்வை நான் அறியாததாலோ என்னவோ?).  இந்த கதாபாத்திரத்தையா பத்திரிக்கைகள் ஒரு Ideal அப்பா என்றெல்லாம் கொண்டாடின?.  வேண்டாத திருமணத்திற்குப் பின்னான ப்ளாஷ்பேக் முடிந்த பின்னால் ஆர்யா புதுவாழ்விற்கு தயாரானாலும், நயன்தாரா தயாரில்லை என்பதால், வாழ்க்கைப் பிரச்சனை ஓடிக்கொண்டிருக்கிறது.

இடைவேளைக்குப் பிறகு சந்தானத்தின் மூலம் ஆர்யாவின் முதல்காதல் ப்ளாஷ்பேக்.  நயன், ஜெய் காதல் ஒரு கவிதை என்றால், ஆர்யா நஹ்ரியா நசீம் காதல் ஒரு ஹைக்கூ.

அரைகுறையின் ஃப்ளாஷ்பேக்:
நான் எப்போதும் தேவைக்கு அதிகமாகப் பொய் சொல்லமாட்டேன், இந்த இடுகையின் தலைப்பிலேயே சொல்லியிருந்தேன் இது ஒரு அரைகுறை விமர்சனம் என்று.  அதனால் விமர்சனத்தை அரைகுறையாகவே முடித்துவிட்டேன்.  படம் பாத்துட்டு வந்த அன்னிக்கு உக்காந்து விமர்சனம் எழுத ஆரம்பிச்சேன், பாதியில விட்டுட்டேன் (தூங்கிருப்பனோ? சே சே இருக்காது. வேற ஏதோ காரணமாயிருக்கும்) அப்புறம் அப்டியே விட்டாச்சு, தீடீர்னு இன்னிக்கு கையில திரும்ப கெடச்சது, சரி கழுத எழுதிபுட்டோம் நம்ம ஃப்ளாக்-ல போட்டு வுட்டுடுவோம்னு தான்.

பிஃபோர் சன்ரைஸ்(Before sunrise) - திரைப்பட விமர்சனம்/மதிப்பீடு

Before sunrise:
ஒரு ரயில் பயணத்தில் சந்திக்கும் முன்பின் தெரியாத அறிமுகம் இல்லாத ஒரு இளைஞனும், இளைஞியும் மெல்ல பேச ஆரம்பித்து, அதனபின் ஒரு நாளை இருவரும் வியன்னாவில் ஒன்றாக செலவிடலாம் என முடிவெடுக்கின்றனர்.  அந்த ஒரு நாளில் இருவரும் என்ன செய்கிறார்கள்/பேசிக்கொள்கிறார்கள் எனபதுதான் இந்த முழுப்படமும்.

ஒரு ஆணும் பெண்ணும் பேசுகிறார்கள் இதுதான் படம், அவர்கள் எப்படி பேசிக்கொற்வார்கள், என்னவெல்லாம் பேசிக்கொள்வார்கள் என்பதை கன கச்சிதமாக யோசித்து படத்தின் வசனமாக வைத்திருக்கிறார்கள்.  படத்தின் மிகப் பெரிய பலம் வசனங்களும், திரைக்கதையும்.  முன்பின் தெரியாதவர்களாக பேச ஆரம்பிக்கும்போது என்ன/எப்படி பேசுகிறார்கள் நடந்து கொள்கிறார்கள், சில மணிநேரம் கழித்து பேச்சு எப்படி மாறுகிறது அவர்களுக்கிடையே அன்யோன்யம் எப்படி மாறுகிறது என்பது அற்புதமாக படத்தில் காட்டப்பட்டுள்ளது.

ஒரு ஆண் பெண் இருவருக்கும் இடையே ஒரு மெல்லிய புரிதல் உள்ளது இருவருக்கும் ஒருவரையொருவர் பிடித்துள்ளது, ஆனாலும் ஒரு சிறு அறையில் (ஒரு இசை ஆல்பத்தின் இசைத்தட்டை ஒரு  Trial roomல் பாடவிட்டு கேட்கும்போது) இருவரும் கண்பார்த்து பேசமுடியாமல் தவிக்கும் ஒரு காட்சியில் இருவரின் நடிப்பும் அவ்வளவு அற்புதம்.

பார்க்க வேண்டிய ஒரு திரைப்படம்.. எனது மதிப்பீடு 7.5/10