தொழில்நுட்ப உலகம் கடந்த வாரம் ஒரு பார்வை(31-03-13 முதல் 06-04-13வரை)

• ஃபேஸ்புக்(Facebook) ஆன்ட்ராய்டை அடிப்படையாகக் கொண்டு ஃபேஸ்புக்கின் அம்சங்கள் நிறைந்த ஒரு செல்பேசியை தயாரித்து வெளியிட திட்டமிட்டுள்ளதாக செய்திகள் கசிகின்றன.
• இந்தியாவில் தகவல் தொழில்நுட்ப துறையைச் சார்ந்த இணையதளங்களே, இணையத் திருடர்களின் முக்கிய இலக்காக இருப்பதாக நச்சு நிரல் எதிர் மென்பொருள் தயாரிக்கும் நிறுவனமான சிமேன்டெக்(Symentec) கூறுகிறது.
• ஏற்கனவே ஸ்கைப்(skype) போன்ற இணையச் சேவைகளை முடக்க முடிவெடுத்திருந்த சவூதிஅரேபியா(அவர்கள் கேட்ட கட்டுப்பாடுகளை, வரம்புகளை நிறைவேற்றாத பட்சத்தில்), தற்போது அரேபியாவில் மிகப்பிரபலமாக இருக்கும் டிவிட்டர் சேவையிலும் சில முக்கிய முடிவுகளாக, டிவிட்டர் பயனர்கள் தங்கள் அடையாளச் சான்றுகளை(இன்னாருடைய டிவிட்டர் கணக்கு இதுதான் என அவர்கள் அறிய) அரசுக்கு அளிக்கவேண்டும் எனக்கூறியுள்ளது.  இந்த முடிவு டிவிட்டர் அனானிகளைத்(anonymous) தவிர்ப்பதற்காக எடுக்கப்பட்டுள்ளது.
• முட்டாள்கள் தினத்தன்று தேடுபொறி முன்னோடியான கூகுள் பல காமெடி கலாட்டாக்களை ஏப்ரல் 1-ம் தேதி அரங்கேற்றியது.  1. வாசனை அடிப்படையாகக் கொண்ட தேடல் வசதி(Google nose beta), 2. கூகிளின் வரைபடத்தை(map) அடிப்படையாகக் கொண்ட புதையல் வேட்டை 3. கூகுள் பைபர்(fiber) அதி வேக இணைய இணைப்பிற்கான இலவச வசதி என பட்டியல் நீளுகிறது.  பாவம், எத்தனை பேர் ஏமாந்தார்கள் என்று தெரியவில்லை.. ;)
• ஒரு சாம்பிள் கூகுள் வாசனைத் தேடல்
• கூகுள் கிளாஸ்(google glass) 8000 தேர்ந்தெடுக்கப்பட்ட நபர்களால் பரிசோதிக்கப்படவுள்ளதாக தெரிகிறது.  இதில்  புகழ்பெற்ற முக்கியப் பிரமுகர்கள், தொழில்நுட்பம் சார்ந்து எழுதும் நபர்கள், தொழில்நுட்ப விமர்சகர்கள் என பலரும் அடக்கம்.
• புதுதில்லி மற்றும் ஹவுராவுக்கு இடையேயான ராஜ்தானி எக்ஸ்பிரஸில் கம்பியில்லா(wi-fi) இணைய அணுக்கம் வழங்கப்பட்டுள்ளது.  மேலும், இந்த ஆண்டின் இறுதிக்குள் இவ்வசதி ராஜ்தானி, சதாப்தி, தூரந்தோ உள்ளிட்ட 50 இரயில்களிலும் அறிமுகப்படுத்தப்படவுள்ளதாக இரயில்வே அமைச்சர் திரு. பவன் குமார் பன்சால் அறிவித்துள்ளார்.
• சீனாவைச் சேர்ந்த நுண்ணறிபேசி(SmartPhone) தயாரிப்பு நிறுவனம் ஒன்று 5000 mAh திறனுடைய மின்கலத்துடன்(Battery) கூடிய நுண்ணறிபேசியை அறிமுகப்படுத்தவுள்ளது.  தற்போது மோட்டோரோலாவின் டிராய்டு ரேசர் அதிகபட்சமாக 3300 mAh திறனுடைய மின்கலத்தைக் கொண்டுள்ளது.  5000 என்கிற அளவு இதுவரை குளிகைக் கணினிகளில்தான்(Tablet) பயன்படுத்தப்பட்டு வந்தன.
• திரு. ரதேஷ் பாலகிருஷ்ணன் ரெட்ஹேட்(Redhat) நிறுவனத்தின் மேகக்கணிமை குழுவிற்கு  தலைவராக நியமிக்கப்பட்டுள்ளார்.  இவர் இதற்கு முன் மைக்ரோசாப்டில்(Microsoft) பணிபுரிந்தார் என்பது குறிப்பிடத்தக்கது.
• பயர்பாக்ஸ் உலாவி(Firefox browser) நிறுவனமா மோசில்லா(Mozilla)  15 வருடங்களை நிறைவுசெய்துள்ளது.  15 வருடங்களுக்கு முன் நெட்ஸ்கேப்(Netscape) நிறுவனம் தனது நெட்ஸ்கேப் உலாவியின் மூல நிரலை(Sourcecode) பொதுப்பயன்பாட்டிற்கு வெளியிட்டு மோசில்லா திட்டத்தை உருவாக்கியது.
• ஆன்ட்ராய்டில் இயங்கும் நோட்புக்(Notebook pc) கணினிகளை இந்த வருட இறுதியில் கூகுள் வெளியிடும் எனத் தெரிகிறது.
• சாம்சங் தனது கேலக்ஸி ஏஸ் 2-க்கு ஆன்ட்ராய்டு 4.1.2 புதுப்பித்தலை(update) வழங்கியுள்ளது.  எப்படி புதுப்பிப்பது?
  விளக்க காணொளி: நன்றி TechFusions Youtube channel
  
• கட்டற்ற மற்றும் திறமூல(Free and open source) தரவுதள மேலாண்மை(Database management) மென்பொருள்களில் ஒன்றான போஸ்கிரெஸ்க்யூல்(PostgreSQL), தரவுகளுக்கு ஊறுவிளைவிக்கும் ஒரு முக்கிய வழு அதன் மென்பொருளில் உள்ளதைக் கண்டறிந்துள்ளது.  தற்போது அதை நிவர்த்தி செய்யும் தீர்வினையும் அதன் மூல நிரலில் சேர்த்துள்ளது.  இவ்வழு அதன் 9.0, 9.1, 9.2 ஆகிய பதிப்புகளில் உள்ளதெனவும், அதனால் தரவுதள மேலாளர்களை(DB Administrators) PostgreSQL 9.2.4, 9.1.9 அல்லது 9.0.13 பதிப்புகளைத் தரவிறக்கி பயன்படுத்த அறிவுறுத்தியுள்ளது.  கண்டறியப்பட்ட வழு வேறெந்த தீகொந்தர்களாளும்(hackers) பயன்படுத்தப்(exploit) பட்டதாகத் தகவலில்லை என்றும் குறிப்பிடப்பட்டுள்ளது.
• வீடியோகான் நிறுவனம் தனது VT75C குளிகைக்கணினியை இந்தியாவில் அறிமுகப்படுத்தியுள்ளது.  இதன் முக்கிய சிறப்பு இது மற்ற சிம் கார்டுடன் கூடியது, மேலும் சிம் கார்டின் வாயிலாக 2G வழியில் இணைய இணைப்பையும் உபயோகப்படுத்தலாம்.  விலை இந்திய ரூபாய் 6,500-ஆக இருக்கும் எனத்தெரிகிறது.
• ஆன்ட்ராய்டுக்கான குரோம் உலாவியில் அதன் மேசைக்கணினிக்கான பதிப்பில் இருக்கும் கடவுச்சொல்(Password) ஒருங்கிணைப்பு(sync) வசதி அறிமுகப்படுத்தப்பட்டுள்ளது.
• சாம்சங் நிறுவனமும், மோசில்லாவும் இணைந்து செர்வோ(Servo) என்கிற  நகர்பேசிகளில் பயன்படுத்தப்படும் ஒரு புதிய உலாவி எஞ்சினை(Engine) உருவாக்கும் பணியில் ஈடுபட்டுள்ளன.
• மோசில்லா தனது பயர்பாக்ஸ் உலாவியின் புதிய பதிப்பை வெளியிட்டுள்ளது(பதிப்பு எண் 20).  இப்புதிய பதிப்பில் பல புதிய அம்சங்களும்(features) முக்கியமாக ஒவ்வொரு டேபிலும்(Tab) கூட தனிப்பட்ட உலாவல்(Private browsing) மேற்கொள்ளும் படி மாற்றப்பட்டுள்ளது(முந்தைய பதிப்புகளில் மற்ற சாளரங்கள் மூடப்பட்டு தனிஉலாவலுக்காக ஒரு புதிய சாளரம் திறக்கப்படும், அதில் உள்ள அனைத்து டேப்களுமே தனிஉலாவல் முறையிலேயே இருக்கும்), சில முக்கிய வழு நிவர்த்திகளும்(bug fixes) செய்யப்பட்டுள்ளன.
• சாம்சங்கும், மோசில்லாவும் இணைந்து ரஸ்ட்(Rust) என்கிற ஒரு புதிய நிரல் மொழியை உருவாக்கியுள்ளன.  இது சி++-க்கு மாற்றாக அமையலாம் எனக்கூறப்படுகிறது.

மேலும் படிக்க:
இதற்கு முந்தைய வார தொழில்நுட்ப செய்திகளைப் படிக்க -> இங்கே சொடுக்கவும்
இதற்கு அடுத்த வார தொழில்நுட்ப செய்திகளை படிக்க ->  இங்கே சொடுக்கவும்

தொழில்நுட்ப உலகம் கடந்த வாரம் ஒரு பார்வை(24-03-13 முதல் 30-03-13வரை)

• டிசிஎஸ் மற்றும் கேப் ஜெமினி இரண்டு நிறுவனங்களும் நார்வே போஸ்ட்டிடமிருந்து(Norway Post) இந்திய ரூபாய் 233 கோடிக்கான திட்டத்தை(project) பெற்றுள்ளன.
• ஆன்ட்ராய்டு மற்றும் ஆப்பிள் ஐஓஎஸ்க்கு போட்டியாக விரைவில் பல புதிய மொபைல் இயங்குதளங்கள்(Mobile OS) வரவுள்ளன.  ஒன்று நாம் எல்லோரும் முன்பே அறிந்த(?) பயர்பாக்சு மொபைல் ஒஎஸ், லின்க்சை அடிப்படையாகக் கொண்டு உபுண்டு(ubuntu) தயாரித்த நிறுவனமான கனோனிக்கல் உபுண்டு மொபைல் ஒஎஸ்-ஐ வருட இறுதியில் வழங்கவுள்ளது.  இதை தவிர்த்து லினக்சை அடிப்படையாக வைத்து டைசன்(Tizen), செயில்பிஷ்(Sailfish) போன்று பல நகர்பேசி இயங்குதளங்கள் வரவுள்ளன. 

• இந்தியாவில் கூகுள் நெக்சஸ்(Google Nexus) விற்பனைக்கு வருகிறது(ரூ. 15999), கூகுளின் பிளே ஸ்டோரிலிருந்து வாங்கலாம்.
• 'குறைந்த விலை ஆகாஷ் டேப்ளட்(Aakash Tablet) திட்டம் நிறுத்தப்படலாம்' வதந்தி என மனிதவளத்துறை அமைச்சர் திரு பள்ளம் ராஜூ மறுப்பு

• எச்பி(HP) நிறுவனம் கண்ணாடி அணியாமல் காணும் வகையிலான நகர்பேசி முப்பரிமாணத்(3D) (காட்சித்)திரையை உருவாக்கியுள்ளது.
• ஜக்ஸ்டர் பன்னாட்டு நிறுவனம்(Jaxtr Inc.,) ஒரு பன்னாட்டு சிம் கார்டை(Global SIM card) உருவாக்கியுள்ளது.  இதன் மூலம் எந்த நாட்டிலிருந்தும், எந்த நாட்டிற்கும் தொலைபேசலாம், குறுஞ்செய்தி அனுப்பலாம், இணைய இணைப்பையும் பெறலாம்.  எல்லா பன்னாடு விமானநிலையங்களிலும் இந்த சிம் கார்டை வாங்கலாம் அல்லது இணையத்தில் ஆர்டர் செய்யலாம்.    
• குறிப்பு: இணையத்தில் ஒரு புரட்சியை ஏற்படுத்திய ஹாட்மெயில்(Hotmail) உருவாக்குனரான இந்தியர் சபீர்பாட்டியா, யோகேஷ் படேலுடன் தற்போது ஜக்ஸ்டர் நிறுவனத்தை உருவாக்கியுள்ளார்.
• லினக்சு இயங்குதள பணி(மேடை)சூழல்களில்(Desktop Environment) ஒன்றான கேடிஇ(KDE) அதிர்ஷ்டவசமாக ஒரு மிகப்பெரிய நாசத்திலிருந்து தப்பித்துள்ளது.  கேடிஇ அதன் மூலநிரல் களஞ்சியத்தில(source code repository) ஏற்பட்ட ஒரு சிறு பிழையின் காரணமாக அதன் ஒட்டுமொத்த மூலநிரல்களையும் இழக்க வேண்டிய நிலை ஏற்பட்டது,  அதிர்ஷ்டவசமாக அதிலிருந்து தப்பித்தது.
• சில நாட்களுக்கு முன்பு கூகுள் தனது இந்தியப்பகுதியின் கூகுள் மேப்ஸை மேம்படுத்தும் விதமாக, கூகுள் பயனர்களை பங்களிக்கக்கோரி ஒரு காணொளிப்படத்தின் மூலம் பரப்புரை நிகழ்த்தியது(Google Mapathon 2013).
  காணொளியைக் காண இங்கே ->
  இதனால் இந்தியாவின் ஒவ்வொரு சதுர மீட்டரைப்பற்றிய முழுத்தகவல்களும் விபரமும் கூகுளின் அமெரிக்க தரவுதளத்திற்கு செல்லும், இந்தியாவின் பாதுகாப்பு சம்பந்தப்பட்ட இந்த விஷயத்திற்கு இந்திய அரசின் அனுமதி பெறாமல் எப்படி பரப்பரை நிகழ்த்தினார்கள் என பிஜேபி(BJP) எம்பி(MP) தருண்விஜய் கேட்டுள்ளார்.

• ரெட்பஸ்(Redbus) நிறுவனர் Phanindra Sama உள்ளிட்ட பெங்களூரைச் சேர்ந்த 7 பேர் MIT புதுமைபடைப்போராக தேர்ந்தெடுப்பு.
  
• கூகிளின் கூகுள் கிளாசுக்கு பல்வேறு தரப்புகளிலும் இருந்து தனிமனித அந்தரங்கத்திற்க்கு ஊறு விளைவிக்கும் என்று  தடை செய்யக்கோரி எதிர்ப்பு வலுக்கிறது.
• கூகுளுக்கும், நோக்கியாவுக்கும் இடையே காணொளி encoding-க்கான VM8 தொழில்நுட்பத்திற்கான பிரச்சனை வலுக்கிறது.

மேலும் படிக்க:
இதற்கு முந்தைய வார தொழில்நுட்ப செய்திகளைப் படிக்க ->
இதற்கு அடுத்த வார தொழில்நுட்ப செய்திகளை படிக்க ->  இங்கே சொடுக்கவும்

கவிதைகள்...

ரகசிய ரகசியங்கள்..

என் பெற்றோரிடமும்
 சொல்லாத ரகசியங்களை
என் சகோதரியிடம்
 சொல்லியிருக்கிறேன்
என் சகோதரியிடமும்
 சொல்லாத ரகசியங்களை
என் நண்பர்களிடம்
 சொல்லியிருக்கிறேன்
என் நண்பர்களிடமும்
 சொல்லாத ரகசியங்களும்
என்னிடம் இன்னுமும்
 ரகசியமாயிருக்கிறது.
மிச்சமிருக்கும் இந்த
 ரகசிய ரகசியங்களை
நினைக்கும்போது சில
சிரிப்பையும், சில அழகையையும்
தருகின்றது..


 பிடித்த கவிதை எது?

கவிஞன் ஒவ்வொருவனும்
 கர்பிணிப் பெண்தான்
மனதில் கருவான கவிதை
 பிரசவம் ஆகும் வரை
அதிலும், தலைபிரசவம்
 அப்பப்பா சொல்லிமாளது
தான் கொண்டது பொய்
 கர்பமா என்று சந்தேகம்
கவிஞனுக்கே இருக்கும்
 தலைக்கவிதை பிரசவமாகும் வரை...
பெற்றெடுத்த தாய் போல்தான்
 கவிஞனும் அவன்
பெற்றக் கவிதைப்
 பிள்ளைகளில் பேதம் பார்ப்பதில்லை
தயவுசெய்து எந்த கவினிடமும்
 கேட்காதீர்கள் உங்கள்
கவிதையில் பிடித்தது எது என்று.

சமூகமும் கவிதையும்..

போராட்டம்...
அந்தக்கால அரசியல்வாதிகள், தியாகிகள்
போராடியதெல்லாம் எம்மாத்திரம்
இன்று நாங்கள் போராடுகிறோம்,
காவிரி தண்ணீருக்காக,
கற்பழிக்கப்பட்ட பெண்ணிற்காக
பசித்திருக்கம் ஜீவன்களுக்காக,
ஈழத்திற்க்காக,
பெண்ணுரிமைக்காக,
அணு உலைக்காக,
என்ன? எப்படியென்று விளக்க வேண்டுமா?
ஐயோ! எனக்கு அதற்கெல்லாம் நேரமில்லை..
இதோ தொடர்ந்து போராட
இன்னொரு புதுப்பிரச்சனை கூட கிடைத்துவிட்டது.
வாருங்கள் போராடுவோம்..
லைக்கும்(like), கமெண்டுமாக(comment)
முகநூல்(facebook) பக்கத்தில்...


என் பெயர்...
எனக்கு ஞாபகமிருக்கிறது
பச்சை வண்ண ஆடைதான்
எனக்கு எப்போதும் விருப்பமானது
அதை அணிந்து சல சலவென
சத்தம்போட்டு ஓடிக்கொண்டிருப்பேன்
அப்பொழுதுதான் அது நடந்தது
ஒருவன் அல்ல, பல பேர்
ஒரு நாள் அல்ல, பல வருடங்கள்
ஒரு நேரமல்ல, எந்நேரமும்
என்னை மாறி மாறி சீரழித்தார்கள்
சிலர் என் அழகை அள்ளிப்போனர்கள்
சிலர் அழுக்கை இட்டு நிரப்பினார்கள்
என்னை விட்டுவிட சொல்லி கதறினேன்
காப்பாற்றச் சொல்லி மன்றாடினேன்
கேட்பாரில்லை..
மேலும், மேலும் சீரழிக்கப்பட்டேன்
கடைசியாக புள்ளிவிபரம் கொடுத்தார்கள்
என் அளவுக்கு சீரழிக்கப்படவர்கள்
யா(ஆ)றும் இல்லையாம்..
என் வனப்பை இழந்து
நாதியற்று கிடக்கிறேன்
என் பெயர் "பாலாறு"

மனதை மிகவும் பாதித்த பாலாறு பாழ்பட்டது குறித்தான ஆவணப்படம் யூடியூபில் https://www.youtube.com/watch?v=mxksl0VgBOY


எங்களையும் சேர்த்துக்கொள்ளு(ல்லு)ங்கள்...
ஏற்கனவே அழித்தொழுத்துவிட்டீர்கள்
சின்ன சிட்டுக்குருவியில் ஆரம்பித்து
பெரிய காட்டுயானை வரை
இனி அழிந்துபோன இனங்களில்
எங்களையும் சேர்த்துக்கொள்ளு(ல்லு)ங்கள்..
இப்படிக்கு,
உங்களுக்காகவே வாழ்ந்த
ஆறு, மலை, ஓடை, ஏரி, குளம், வாய்க்கால்...

மதிப்பெண்...
கல்வி கார்ப்பரேட் தொழிலானது
வாத்தியார்கள் வியாபாரிகளானார்கள்
பள்ளிப்பிள்ளைகள் பிராய்லர் கோழிகளனார்கள்
மதிப்பெண், மதிப்பிழந்தது.

தோழ(ழி)மைக் கவிதைகள்..

முன்னாள் தோழி
இனி உன்னோடு என்னால்
 உரிமையாக பேச முடியாது
என் சுகத்தையோ, சோகத்தையோ
 பகிர முடியாது
என் சந்தேகத்தை கேட்க
உன் சந்தேகத்தை தீர்க்க முடியாது
ஏனென்றால்
நான் முன்பிருந்த நானில்லை
நீ முன்பிருந்த நீயில்லை
விட்டுச் சென்றுவிட்டன
ஜிவன்கள்
ஏனென்றால்.. நீ
இன்னொருவனுடைய இந்நாள் மனைவியான
என்னுடைய முன்னாள் தோழி..


அழகான அந்த நாள்
உன் திருமணத்திற்குப் பின்
நாம் தொடர்பற்றுப் போனபின்
11 மாதங்கழித்து
ஒரு வழக்கமான என்னுடைய
அவசர காலையில்
என் அறையின்
முகத்தளவு கண்ணாடியில்
தலைவாரிக்கொண்டிருந்த போது
புதிய எண்ணிலிருந்து அழைப்பு
"ஹலோ.." மறுமுனையில்
"களுக்" என்கிற உன் சிரிப்பு..
எனக்கே ஆச்சரியம்தான்
எப்போதுமே தொலைபேசியில் குரலை
அடையாளம் காணமுடியாத நான்
உன் குரலை, சிரிப்பை மட்டும்
எப்படி கண்டுகொண்டேனென்று
உனக்குத் தெரியாது
உன் அழைப்பிற்குப்
பிறகான என்னுடைய அந்தநாள்
எவ்வளவு அழகாயிருந்தென்று... ;)


ஞாபகமிருக்கிறதா...?
உனக்கு என் ஞாபகம்
எப்போதாவது வந்ததுண்டா?
இப்படி நீ கேட்டபோதெல்லாம்
"இல்லை" என்று மட்டும்தான்
நான் சொல்லியிருக்கிறேன்..
இப்பொழுது அடிக்கடி
உன் ஞாபகம் வருகிறது..
சொல்ல முடியவில்லை..
ஏனென்றால்,
நான் உரிமையோடு பேசும் என் தோழி
இன்று இன்னொருவனின் உரிமை மனைவி.